Агарэвічы. Сядзіба Апацкіх.

Некалі в. Агарэвічы належыла даволі заможнаму роду Свяржынскіх, герб "Пагоня". У 1-й палове ХVІІІ ст. гаспадаром Агарэвіч стаў Міхаіл Свяржынскі, а з сярэдзіны ХІХ ст. і да 1939 г. Агарэвіцкім дваром валодаў род Апаскіх, герб "Прус". Сядзібна-паркавы ансамбль уключаў палац, мураваную стайню, гумно, парк, сажалкі і ўязную браму на двух мураваных слупах.

У 1-й палове ХІХ ст. Свяржынскія ўзвялі ў Агарэвічах драўляны палац, а новыя гаспадары ў 1911 г. яго значна перабудавалі. Будынак палаца аднапавярховы, Г-падобны ў плане, накрыты закругленым з усходняга боку двухсхільным дахам, а з заходняга - паўвальмавым з дэкарыраванымі дахавымі вокнамі.

З усходняга боку дабудавана паўратонда зімовага саду. Ганак галоўнага ўваходу накрыты двухсхільным дахам на чатырох слупах. Планіроўка сядзібнага дома грунтуецца на анфіладнай кампаноўцы рознавялікіх аб'ёмаў вакол двух вестыбюляў. У асобных пакоях захаваліся фрагменты фрэсак і сафітаў.

(Л.М. Несцярчук Замкі, палацы, паркі Берасцейшчыны Х-ХХ стагоддзяў)